უკრაინაში ომის დასრულების შესახებ შესაძლო მოლაპარაკებები ევროპის მონაწილეობით უნდა გაიმართოს, ხოლო ტერიტორიული დარეგულირების ათვლის წერტილად, შესაძლოა, ფრონტის ამჟამინდელი ხაზი იქცეს. ამის შესახებ გერმანიის კანცლერმა ფრიდრიხ მერცმა ბერლინში, "მსურველთა კოალიციის" სამიტის შემდეგ გამართულ პრესკონფერენციაზე განაცხადა.

მერცის თქმით, სამშვიდობო შეთანხმება შეუძლებელია უკრაინის, რუსეთის, აშშ-ისა და ევროპული ქვეყნების მონაწილეობის გარეშე. მან უარყო სცენარი, რომლის დროსაც ევროპული უსაფრთხოების საკითხები ევროპის გარეშე განიხილებოდა. "იალტის ფორმატი მშვიდობას არ მოიტანს", — განაცხადა კანცლერმა და იგულისხმა 1945 წლის იალტის კონფერენციის შედეგები, რამაც ევროპის ორ ბლოკად გაყოფა გამოიწვია.

მერცი მიესალმა ვაშინგტონის ძალისხმევას მოსკოვთან ახალი კონტაქტების დამყარების კუთხით და მადლობა გადაუხადა აშშ-ის ადმინისტრაციას მოლაპარაკებების პროცესში ევროპელების ჩართვის მზადყოფნისთვის. მისი თქმით, ბერლინში უნდა გამართულიყო ევროპის, უკრაინისა და აშშ-ის წარმომადგენლების კონსულტაციები.

გერმანიის მთავრობის მეთაურმა მომავალი დარეგულირების შესაძლო პარამეტრები მონიშნა. მისი თქმით, ტერიტორიული მოლაპარაკებების საფუძველი რუსული და უკრაინული ჯარების შეხების ამჟამინდელი ხაზი უნდა გახდეს. მერცმა ასევე ხაზგასმით აღნიშნა, რომ უკრაინამ უნდა შეინარჩუნოს დასავლურ სტრუქტურებთან ინტეგრაციის უფლება და ცეცხლის შეწყვეტის შემდეგ უსაფრთხოების საიმედო გარანტიები მიიღოს.

ამასთან, ბერლინი უშვებს რუსეთის წინააღმდეგ სანქციების ეტაპობრივ გაუქმებას იმ შემთხვევაში, თუ მოსკოვი მოლაპარაკებებისა და დათმობებისთვის მზად იქნება. "სანაცვლოდ, გარკვეული პირობების შესრულებაზე დამოკიდებული რუსეთის წინააღმდეგ სანქციების გაუქმება ეტაპობრივად განხორციელდება", — თქვა მერცმა.