რუსეთში "უცხოეთის აგენტად" გამოაცხადეს კომპანია Mavi Group, რომელიც, სხვა საკითხებთან ერთად, ორენოვან გაზეთს — Moskauer Deutsche Zeitung-ს (MDZ) და გერმანულენოვან წიგნებს გამოსცემს, ასევე სიაში მოხვდა "გერმანული კულტურის საერთაშორისო კავშირიც". შესაბამისი პრესრელიზი რუსეთის იუსტიციის სამინისტროს ვებგვერდზე გამოქვეყნდა.
უწყებაში განაცხადეს, რომ Mavi Group ოკუპანტი ხელისუფლების გადაწყვეტილებებისა და პოლიტიკის, ასევე ქვეყნის საარჩევნო სისტემის შესახებ არასანდო ინფორმაციას ავრცელებდა.
"კომპანია მონაწილეობდა ანტირუსული მიმართულების მასალების გავრცელებაში. აქვს დაფინანსება უცხოური წყაროებიდან", — აღნიშნულია ოკუპანტების იუსტიციის სამინისტროს განცხადებაში. ოქტომბრის დასაწყისში მოსკოვის ოლქის ტელეარხი "360°" წყაროებზე დაყრდნობით იტყობინებოდა, რომ კომპანიის მიერ გამოცემულმა გაზეთმა MDZ-მა მუშაობა 2027 წლის ბოლომდე შეაჩერა.
სიაში "გერმანული კულტურის საერთაშორისო კავშირის" შეყვანა კი იმით ახსნეს, რომ ორგანიზაცია უცხოურ დაფინანსებას იღებდა და თანხებს ანტირუსული მიმართულების მასალების გასავრცელებლად გამოყოფდა.
23 ოქტომბერს "უცხოეთის აგენტების" სიაში ასევე შეიყვანეს ბერლინში მომუშავე ონლაინ-გამოცემა "ეხოსა" და ტაბლოიდ Bild-ის ჟურნალისტი მაქსიმ კურნიკოვი, ასევე მოსკოვის საქალაქო სათათბიროს ექს-დეპუტატი ელენა შუვალოვა.
გარდა ამისა, რეესტრში აღმოჩნდნენ საზოგადოებრივ-პოლიტიკური პროექტი Beyond Propaganda, რომლის დამფუძნებლებიც, როგორც რუსეთის იუსტიციის სამინისტრო მიუთითებს, ქვეყნის ფარგლებს გარეთ ცხოვრობენ, და პროექტი — "პოლიტიკის სივრცე. ნოვოსიბირსკი". ამ უკანასკნელის ფილიალები ასევე გახსნილია მოსკოვში, სანქტ-პეტერბურგში, ეკატერინბურგში, ყაზანსა და ომსკში. მისი წევრები ადგილობრივი მცხოვრებლებისთვის პოლიტიკურ დისკუსიებს, დებატებსა და კინოჩვენებებს ატარებენ.